Pontedeume é un pobo costeiro situado nas Rías Altas de Galicia. O seu principal atractivo reside na perfecta conxunción de río, mar e montaña. Situado na desembocadura do río Eume e na ladeira do monte Breamo, é unha das vilas galegas con máis atractivo de cara ao turismo.
Panorámica de Pontedeume desde a parroquia de Nogueirosa. (Foto: Jesroma)
De pasado medieval, percíbese nas súas rúas a pegada dos Condes de Andrade, a cal aínda perdura co paso dos séculos. Como o seu nome indica, a seña de identidade por excelencia de Pontedeume é a súa ponte de pedra sobre o río Eume, que aínda que non é a orixinal construída na época dos Andrade, mantén a esencia do que foi un paso estratéxico en todas as épocas.
A beleza do enclave de Pontedeume pódese apreciar en todo o seu esplendor nesta foto.
(Foto: Javier Cabana)
Pontedeume reúne unha serie de reclamos para o turista que o fan imprescindible en calquera visita a Galicia. O turista poderá ver o casco antigo da Vila, onde se atopan o Torreón dos Andrade, a Igrexa de Santiago, os restos da antiga muralla, a Igrexa das Virtudes, así como as Fragas do Eume (co seu Mosteiro de Caaveiro), o Castelo de Andrade, a Capela de San Miguel de Breamo, e outros moitos lugares.
Ademais, Pontedeume é un pobo para o descanso, pois posúe innumerables praias e calas, así como zonas de campo onde perderse facendo rutas. En piragua, a cabalo, en bicicleta, a pé; calquera maneira é boa para coñecer a Vila e os seus arredores.
Inicio
